Gansbaai se karate-lede wat sertifikate ontvang het, met voor vlnr TJ du Plessis, E van der Westhuizen en M Boshier, Agter hulle vlnr is M Herselman, R King, O Viljoen en D Boshier, met hulle Sensei, Ronnie Knott, agter.
“Die Karate-Ka van Gansbaai doen besonders goed en ek is steeds baie tevrede met hulle vordering, asook hulle prestasies wat hulle tot op datum bereik het,” sê Sensei (afrigter) Ronnie Knott. Op 26 November is hulle suksesvol in die onderskeie gordel-kategorieë gegradeer. Op Saterdag, 30 November het die Suid-Afrikaanse Japanse Karate Assosiasie (SA JKA Karate) hulle 9de jaarlikse spankompetisie gehou en 5 Gansbaaiers het medaljes ontvang: TJ du Plessis, M Herselman, R King, M Boshier en D Boshier.
Hierdie groepie, asook E van der Westhuizen, O Viljoen, ook van Gansbaai, is almal ook met sertifikate en gordels beloon nadat die swart-gordel demonstrasies afgehandel is. Ronnie self het ook ‘n “kata”-demonstrasie tydens die byeenkoms aangebied.
Ronnie het in 1973 met karate begin en beskik oor die Graad van Swartgordel, 5de Dan. SA JKA Karate is direk met die Japanese Karate Assosiasie (JKA) geaffilieer, wat as die grootste karate organisasie ter wêreld beskou word. In Gansbaai kan kinders vanaf die ouderdom van 6 jaar by die klub aansluit en hulle oefen elke Dinsdag in Gansbaai Inligtingsentrum vanaf 14:30 tot 15:30. Sensei Ronnie Knott kan by 083-800-9728 gekontak word, of stuur ‘n e-pos aan hom by senseisajka@hermanus.co.za.
Hardus Botha
