Fynbos-Skaapkop Fees 2023: Baardskeerdersbos
Baardskeerdersbos se Fynbos-Skaapkop Fees van Saterdag en Sondag (2-3 September 2023) is ‘n eerste van sy soort - met pret en plesier ‘vir Afrika’, vir oud en jonk! Die organiseerders het hulself elke jaar oortref met die aanbied van hulle Basaar en Skaapkopete (afsonderlik). Vanjaar was dit nie net ‘n kombinasie nie, maar ‘n absolute wenner - met 135 skaapkoppe, wat eintlik te min was!
Daar was stalletjies om van te kies en te keur en die voedselstalletjies het vir vingerlek-lekker eetgoed gesorg - om nie van die pannekoek-toue te praat nie. Die feesterrein en binnekant van die groot tent was ‘n miernes soos wat feesgangers alles bekyk en geniet het. Die gewilde Strandveld Boere-orkes was op hulle stukke. Pro Musica se kinder-boere-orkes het hulself met puik optredes onder leiding van Asanti Smit oortref. Ruben Lennox se sangstem het verdere luisterrykheid aan die fees-atmosfeer verskaf.
Die Fynbosuitstalling was fenominaal, met Adriaan Hanekom en Aletta Groenewald aan die stuur van sake. ‘n Berg in die kleine is aangebied, met ‘n koel watergat en massas fynbos. Die Fynbos-spesie uitstalling was ook besonder interessant - besoekers kon nie genoeg van die uitstalling kry nie en foto’s is geneem asof dit uit die mode is.
Sondag is ‘n spesiale Erediens gehou, met ds Hanri Joubert wat die boodskap gebring het. Baardskeerdersbos se Kerkorkes het opgetree, Laerskool Gansbaai se skoolkoor het gesing en Ruben Lennox het weer opgetree. Na afloop van die verrigting Sondag, is daar gesellig met koek en tee verder gekuier. Die organiseerders, wat baie hard gewerk het, is dit eens dat die Feesnaweek ‘n enorme sukses was.
