Soos wat hierdie bejaardes ‘n smaaklike Kersete geniet wat deur die NG Vrouediens aangebied is, so is daar vele gesinne wat nie die voorreg van ‘n Kersete het nie, maar wat wel met behulp van die “One More Kersete” kan realiseer
BADISA Hermanus, Stanford en Gansbaai Maatskaplike Dienste het besluit om vanjaar by die Nasionale “One More” Veldtog aan te sluit - en wel om ‘n “One More Kersete” aan te bied. Die doel van hierdie aanbieding is om ‘n Kersete aan minderbevoorregtes op Tweede Kersdag beskikbaar te stel. Belangstellendes wat hierdie veldtog wil ondersteun, kan Kersetes op 26 Desember tussen 11:00 en 13:00 na die kantore van Gansbaai Maatskaplike Dienste, langs die Pretoriussaal en regoor die Caltex motorhawe, bring. Daar sal iemand aan diens wees om die etes in ontvangs te neem.
Formalite Bakkies vir die doel is in die voorportaal van die NG-gemeente se kerkgebou beskikbaar, asook by die kantore van Gansbaai Maatskaplike Dienste. Die ete word dan na voorafgereelde vrywillige verspreidingspunte geneem, waar voorafgereelde persone dit teen 14:00 sal gaan afhaal. Die Nasionale “One More Veldtog” maak onder ander voorsiening vir “One More family to feed; One More person to turn away from drugs or prostitution; One More frail, older person to be cared for; One More child to be protected”.
Gansbaai Maatskaplike Dienste se kontaknommer is 028-384-0151.
Hardus Botha
