Vlnr: Jolene Filander (3de), mnr Wilson en Bianca de Koning (topkandidaat). Marthinique Adonis (2de)(inlas).
08:00 Dinsdagoggend het mnr Wilson en van die personeel die amptelike uitslae in Caledon gaan haal. Mnr Lawreston, direkteur, was vol lof vir die Overberg skole wat ook aangewys is as die beste distrik in die Wes-Kaap. 47 637 leerders het in 2013 hul matriekeindeksamen geskryf, waarvan 45 850 geslaag het.
Dit gee ‘n persentasie van 85,1%. 40.9% het met ‘n Baccalaureus toelating geslaag.
In die Overberg is die slaagsyfer 88%. 39,4% slaag met Baccalaureus. Nie een skool het onder 60% geslaag nie, wat wys dat die distrik se LITNUM sisteem suksesvol is.
Academia se matrieks het verlede jaar se rekord van 92,2% verbeter met presies een persent en die amptelike slaagsyfer is 93,2%. Daar is ‘n totaal van 74 lede wat geskryf het en vyf leerders het dit nie gemaak nie, een leerder kon nie die eksamen voltooi nie as gevolg van siekte. 16 leerders het hul Baccalaureus gekry, 35 hul Diploma en 17 het hul Nasionale Sertifikaat ontvang.
Die topkandidaat is Bianca de Koning met 5 onderskeidings, Marthinique Adonis in die tweede plek en Jolene Filander derde. Daar is ‘n totaal van 10 onderskeidings. Vakke wat met ‘n honderd persent geslaag is, is Afrikaans, Engels Tweede Addisionele Taal, Gasvryheidstudies, isiXhosa, Lewens-oriëntering, Wiskundige Geletterdheid. Wiskunde spog vanjaar met ‘n allemintige 88,9%. Onderskeidings is behaal in Afrikaans (1), RTT (1), Engels (1), Lewensoriëntering (5), Lewenswetenskappe (1) en Wiskundige Geletterdheid (1).
Die skool wil ook van hierdie geleentheid gebruik maak om vir al die besighede in die dorp dankie te sê vir alles wat hulle vir die skool doen en veral vir die leerders. Die skool is verheug om te sien hoeveel van die leerders vakansiewerk het en sodoende waardevolle ervaring opdoen en verantwoordelikheid leer. Sonder hierdie gemeenskap sal die skool nie in vier jaar al soveel wonderlike mylpale behaal het nie – baie dankie!
Liezel Mostert
