112 Gr1 Skooluniforms

Links is past Frikkie Zeelie besig om die prosedures aan helpers te verduidelik

SHARE (Sopkombuis) het op Maandag, 13 Januarie weer eens vir groot opwinding en dankbaarheid gesorg. Nie minder nie as 112 volledige skooluniforms teen ‘n enorme koste van R35,900 is gratis aan leerders wat vir die eerste keer skool toe gaan, oorhandig.

Die bedrywige toneel van ouers en voornemende leerders voor Gansbaai Pep Stores is jaarliks ‘n gesig om te aanskou. Van vroeg af is daar ‘n samedromming en past Frikkie Zeelie en sy helpers moet bontstaan om sake vlot te laat verloop. “Ons het 6 jaar gelede met hierdie inisiatief begin en met al die ondersteuning wat ons ontvang, kan ons jaarliks meer en meer skooluniforms aan leerders wat dit nodig het, verskaf,” sê past Zeelie.

“Ons wil almal hartlik bedank vir die vele donasies en wonderlike ondersteuning van hierdie noodsaaklike projek, asook alle persone wat ons met die aanpas en uitsortering van goedere vir die kinders gehelp het.

Sonder elkeen van u se hulp kan hierdie jaarlikse projek nie so suksesvol verloop nie.”
Buite die winkel is dit die ene bekommerde gesiggies met vraagtekens op die voorkoppe oor wat hulle gaan kry en óf hulle dit gaan kry.

Met die uitstapslag vertel die glimlaggende en dankbare gesiggies ‘n heel ander verhaal.        
                                    
Hardus Botha


Angstige ouers en voornemende leerders wat wag om binne gelaat te word