Daar is 'n gesegde in Engels wat sê” “All work and no play make Johnny a dull boy”.
Dit is een van die redes waarom daar elke jaar in die Boland en elders 'nbesigheidsliga aangebied word waartydens spanne bestaande uit lede van besighede op dorpe waar rolbal gespeel word, onder mekaar meeding op 'n lighartige en prettige manier. Dit word gedoen onder beskerming van die rolbalklubs op die onderskeie dorpe en dit het ook ten doel om rolbal bekend te stel en te bevorder in die hoop dat meer spelers by klubs sal aansluit om die spel te geniet en die kameraadskap wat onder rolbalspelers bestaan te ervaar. Rolbal is lank nie meer 'n spel vir bejaardes nie en die vaardighede en dissipline wat die spel vereis, bewys diegene verkeerd wat nog onder daardie indruk verkeer sodra hulle aan die spel begin deelneem.
Die Besigheidsliga begin by Franskraal Rolbalklub op Dinsdag, 4 Februarie 2014 om 18:00 en word op elke Dinsdag daarna vir die volgende vyf of ses weke gespeel. Die uiteindelike wenspan kry dan die geleentheid om teen spanne van ander dorpe in die Boland te speel om die algehele wenner in die Boland vir 2014 te bepaal. 'n Span van Gansbaai/Franskraal was al wenners. Dus as jou besigheid nog nie ingeskryf is nie, doen dit asseblief dadelik.
Vir meer besonderhede skakel gerus vir Archie Chambers by 082-4688765. Dit is groot pret. Kom wees deel daarvan.
Pieter Conradie
