Overstrand Munisipaliteit het ‘n skoon oudit vir die 2012/2013-boekjaar behaal. “Die munisipaliteit het die afgelope 6 jaar ongekwalifiseerde ouditverslae gekry, maar vanjaar het ons ‘n skoon oudit ontvang,” het Burgemeester Nicolette Botha-Guthrie tydens Januarie 2014 se spesiale raadsvergadering gesê.
Inwoners kan nou weet dat die dorp se geldsake en algemene bestuur gesond is .
ʼn Ongekwalifiseerde ouditverslag beteken dat die finansiële rekords van die Munisipaliteit in orde is, maar dat daar sekere sake is wat aandag moet geniet. ʼn “Skoon Oudit” beteken dat die Ouditeur-Generaal tevrede is en dat alle wette en regulasies wat daargestel is, nagekom word.
My dank en waardering aan almal, veral die amptenare agter die skerms, vir hul harde werk en toewyding wat ʼn "skoon administrasie", verseker. Dit wys dat Overstrand Munisipaliteit tot ‘n doeltreffende administrasie verbind is en dat daar goeie samewerking tussen politici en amptenare is. Die munisipaliteit beskik ook oor bekwame personeel.
Overstrand Munisipaliteit is een van slegs 11 munisipaliteite in die provinsie wat ‘n skoon oudit vir die 2013-boekjaar kon behaal.
• Die oudit verslag is vervat in die konsep jaarverslag vir 2012/13 wat ook by die spesiale raadsvergadering ter tafel gelê was. Die konsep jaarverslag is beskikbaar aan die publiek vir kommentaar tot Vrydag, 28 Februarie 2014. Afskrifte is beskikbaar by die biblioteke en administratiewe kantore. Alternatiewelik kan dit afgelaai word van die munisipaliteit se webblad www.overstrand.gov.za
