“Dit is ‘n groot voorreg vir my om te weet ek hou skool waar ekself skoolgegaan het,” vertel Harry Tobias (23). Harry het ‘n onderwyserspos met ingang van 27 Januarie 2014 by Gansbaai Primêr aanvaar - ‘n skool waar daar nog heelparty onderwysers is voor wie hyself enkele jare gelede nog op die skoolbanke gesit het. Na sy laerskooljare te Gansbaai Primêr is Harry na Hawston Sekondêre Skool vir sy hoërskoolopleiding. Daarna is hy na die Universiteit van Wes-Kaap vir ‘n BA-graad om homself in ‘n onderwysrigting te kwalifiseer. Hierdie is sy eerste aanstelling en hy is nie bietjie trots om in sy ex-laerskool Wiskunde vir Gr 6 en 7 aan te bied nie, asook Liggaamsopvoeding.
Hardus Botha
