Vlnr is Rigardo Plaatjies, Tertia Pietersen, Mariska Mouers en Renaycia Pietersen in Sophie Lourens se kamer tydens die groep se besoek aan Herberg-aan-See Tehuis vir Bejaardes
Mej Fees van die Ganse (2013/14) en haar gevolg het sommer vroeg in die jaar besluit om met hulle ambassadeurswerk in Gansbaai te begin. Mariska Mouers (Mej Fees van die Ganse), met die twee susters as haar prinsesse, Renaycia Pietersen (1ste Prinses) en Tertia Pietersen (2de Prinses) het saam met hulle organiseerder, Rigardo Plaatjies op Saterdag, 25 Januarie welwillendheidsbesoeke aan Herberg-aan-See Tehuis vir Bejaardes, Silwerjare Dienssentrum en Oak Grove Nasorgsentrum afgelê.
Die driestuks het mooi-versierde geskenkpakkies met koekies aan die onderskeie bejaardes oorhandig en geselsies met hulle aangeknoop. “Ons is oral goed en met dankbaarheid ontvang en het baie tuis gevoel,” vertel Mariska. “Hierdie besoeke was nog net die begin van hulle verantwoordelikhede vir 2014,” het Rigardo gesê. Enkele openbare optredes wat nog in die pyplyn is, is onder andere ‘n besoek aan BARC, nog besoeke aan die Tehuise vir Bejaardes en hulpverlening gedurende skoolvakansies by die Sopkombuis in Beverley Hills en kleuterskole. Hierdie drie pragtige dametjies is leerders van Gansbaai Academia en laat beslis nie op hulle wag om gemeenskapsdiens as deel van hulle “koninklike” verantwoordelikhede te doen nie.
Hardus Botha
Die Feestelike “Koninklikes” tydens hulle besoek aan Silwerjare Dienssentrum en Oak Grove Nasorgsentrum, met voor vlnr Tertia Pietersen, Mariska Mouers, Renaycia Pietersen en Rigardo Plaatjies
