Pasop vir die Seagulls Netbalgroep
-‘Ons is gereed vir 2024’-
“Pasop, omliggende dorpe, ons Seagulls Netbalspanne is gereed vir 2024,” sê Sylvia Jacobs, voorsitter en afrigter van die Seagulls Netbalgroep. “Tans het ons twee spanne wat aktief en gereed is.”
Die groep netbalspelers was hard aan die oefen met Gans-Berg Nuus se onlangse besoek aan hulle. Verlede jaar het hulle gespog met ‘n trofee, medaljes en sertifikate ná ‘n opwindende netbalbyeenkoms in Grabouw.
“Ons nooi graag netbal-belangstellendes vanuit alle gemeenskappe in Groter Gansbaai om by ons aan te sluit,” het Sylvia gesê. “Ons bestaan nie nét uit Blompark-inwoners nie.”
Vir navrae rakende die Seagulls Netbalgroep, kan Sylvia Jacobs by 072 413 6861 geskakel word.
