Silvana Burger, eienaar van Build It in Gansbaai, het besluit om nie net boumateriaal vir wonings te voorsien nie, maar om ook ‘n bydrae tot die “bouwerk” aan Gansbaai Academia se biblioteek te lewer.
Sy het op Maandag, 3 Februarie 2014 ‘n tjek ten bedrae van R7,000 aan Carla Gouws en die skoolhoof, Tommy Wilson oorhandig. Daarmee saam is 100 handige “Build It” pennesakkies, gevul met relevante skryfgoed, asook etlike boeke vir die biblioteek oorhandig.
Vlnr is Carla Gouws, Silvana Burger (Build It) en Tommy Wilson tydens Buildit se ruimskootse bydrae aan Gansbaai Academia se biblioteek
“Ons is baie dankbaar vir hierdie groot gebaar en dit sal die biblioteek sonder twyfel ‘n goeie hupstoot gee,” het Carla gesê. Eddie Burger, wat Silvana vergesel het, het gesê ‘n deel van die fondse is aan Build It se jaarlikse gholfdag te danke. Hy het sy waardering teenoor daardie dag se gholfers uitgespreek. Die res van die fondse, asook die items, is deur Build It verskaf.
Tommy het ook sy waardering uitgespreek en weer eens Gansbaai Academia se afhanklikheid van plaaslike ondersteuning beklemtoon. Vir die skenking van boeke en/of donasies aan Gansbaai Academia se biblioteek, of die skool self, kan die skool by 028-384-2370 geskakel word.
Hardus Botha
