Die opgewonde leerders van Gansbaai Primêr nadat hulle hul sweetpakke ontvang het, met Sara Niemand regs en Carmen Hans links
“Die Buffeljachts Kleinskaalse Vissers het goedkeuring vir 8,693 ton kreef van die Departement ontvang as deel van ‘n tussentydse verligtingstelsel,” vertel Sara Niemand van Buffeljachts.
“Die maatskappy wat die kreef verwerk het, is Two Oceans wat nou ‘n skenking van R7,000 gemaak het wat vir skoolleerders aangewend moet word.” Sara sê daar is hoofsaaklik skoolklere en skryfbenodigdhede met die beskikbare fondse aangekoop. Op Maandag, 3 Maart het sy Gansbaai Academia, Laerskool Gansbaai en Gansbaai Primêr met die welkome skenkings besoek en dit oorhandig. Gansbaai Courant was teenwoordig tydens die oorhandiging van sweetpakke aan Gansbaai Primêr, waar Carmen Hans dit saam met die betrokke leerders in ontvangs geneem het. “Baie dankie aan ons Skippers, Bennie de Wet, Daniel Niemand, Andy Leibrandt en hulle bemanningslede wat so mooi saamgewerk het om die kreef te trek,” sê Sara. “Wanneer die winter kom, sal ons weer aan die tyd dink toe dit so goed met ons in die kreefseisoen gegaan het.” Sara kan vir navrae by 082-723-8804 gekontak word.
Hardus Botha
