SHARE (Social Help Animal Rehabilitasie & Restourasie Education [ECB]), het onlangs weer eens 18 hartjies van Beverley Hills se Speelskooltjie baie bly gemaak. Kos word gereeld daar afgelewer, terwyl Gansbaai Superspar daagliks 20 brode as ‘n donasie skenk.
Op Vrydag, 28 Februarie 2014 het die 18 kleutertjies nuwe hempies en ‘n sakkie met nog klere ontvang omdat hulle die speelskool van die begin af elke dag bygewoon het. Die klere en pakkies is deur die Klein Karoo Bronne Sentrum geborg. Die 3 onderwyseresse is studente wat tans vir pre-primêre onderwys studeer, met hulle kostes wat ook deur Klein Karoo Bronne Sentrum geborg word. “Die studente werk baie hard en sonder enige vergoeding as gevolg van ‘n tekort aan fondse,” sê Marie Reid, een van die ondersteuners. “Baie dankie aan almal wat omgee en hul ondersteuning aanbied om ‘n goeie opvoeding vir die kinders te verseker.”
Navrae oor die Speelskooltjie in Beverley Hills, of belangstellendes om te ondersteun, kan vir past Frikkie Zeelie by 082-498-6992 skakel.
Hardus Botha
