Piet Schoombie, bekende Afrikaanse skrywer, wat onlangs van sy boeke aan Gansbaai Biblioteek geskenk het
Die bekende Afrikaanse skrywer, Piet Schoombie, het onlangs 4 van sy boeke aan Gansbaai Biblioteek geskenk: Engele en Rowers (kortverhale en sketse), Weldade en Misdade (kortverhale en artikels), Afgode (jeugroman) en Mammon (intriges rondom gholf, geld en liefde).
Piet het op ‘n plaas in die Vrystaat grootgeword, maar woon nou in die Wes-Kaap “by die see”. “Ek skryf omdat dit vir my ‘n groot genot en heerlike terapie is,” sê hy. Naas die Afrikaanse skryfkuns, is Piet ook ‘n ywerige skilder en gholfspeler. Nog ‘n paar goedgunstelike en gereelde skenkers van boeke aan die Biblioteek vir wie baie dankie gesê word, is: mevroue De Beer, Cordier, Cooke en Dalgleish; mnr Van der Walt; mnr en me Fouche. “Terselfdertyd wil ons vir almal, en daar is baie skenkers van boeke, baie dankie sê vir hulle kosbare bydraes aan die Biblioteek.
Elke skenking word as waardevol beskou,” sê Edna van der Linde. Gansbaai Biblioteek se vriendelike en behulpsame personeel bestaan uit Sharman Geldenhuys (Bibliotekaris), Zelda Fourie, Edna van der Linde en Busisiwe Mtatase. Hulle gerieflike bedryfsure is Maandae tot Vrydae vanaf 09:30 tot 17:30 en hulle kan by 028-384-8300 vir navrae gekontak word.
Hardus Botha
