Wen 43 – 25
Black Leaves van Gansbaai het verlede Saterdag op sy tuisveld behoorlik met die Proteas van De Doorns afgereken en die veld met 'n vyfpunter verlaat (bonus).
Albei hierdie twee klubs neem vanjaar nuut deel aan die Boland se Superliga kompetisie. Ironies was dit dan tog ook so dat dit die sogenaamde "Top Dogs en Under Dogs" was wat teen mekaar geopen het. Die vorige vier vriendskaplike wedstryde waartydens Michael Vermeulen die manne geslyp het, het die noodsaaklike laat gebeur. Toe die derde en tweede spanne ook nog onderskeidelik hulle wedstryde met 15-0 en 19-0 wen was daar groot vertroue vorentoe ingeboesem.
Black Leaves geniet hierdie komende naweek 'n welkome ruskansie waarna Genadendal weer op 12 April (weg) aan die beurt kom. Op die dag se samespel kan hierdie drie verteenwoordigende spanne vorentoe tot krag gaan. Veral die ervaring en jeug in die B-span het getoon watter mededinging daar is. Koppe, Maans, Felix, Gordon, Andrew, Peter John en Louw se ervaring in die 3de span kan net die dryfveer wees.
Die 2de span is ook nog 'n betreklik jong span wat hul goed van hul taak gekwyt het. Hier het Raymond Kapot glad nie teleurgestel met sy algemene spel nie. Die twee jong skrumskakels, Brendan Dickson en Daan Otto het nou alle blootstelling agter die rug om te gedy. Die eerste span het alreeds hul wedstryd met hul bonuspunt 3 die wedstryd beklink gehad, maar tog het die onbekende De Doorns hulle beproef vir 80 minute rugby. Dit is presies wat hierdie kompetisie gaan vereis. Maar die span het met sy agterlyn vanjaar bewys hulle wil opponente dronk hardloop soos in die geval toe hul puntemakers almal agterlynspelers was. 'n Goeie fondasie natuurlik deur die agttal.
Puntemakers: Drieë: Delano Booysen (2), Melly Tobias (1), Clayton Niemand (1), Gavin Smit (1) en Steward Jacobs (1). Doelskop: Steward Jacobs (5). Strafskop: Steward Jacobs (1).
So Sê Bra G
