Pearly Beach hengelspan spog nou ook met ‘n damespan, met voor vlnr Joanne Bester en Jaenette de Kock en agter vlnr Bertha du Toit, Liezl Myburgh, Colleen de Kock en Karen Hoogendijk
Die Pearly Beach Hengel- en Ontspanningsklub (rots- en strandhengel) is behoorlik aan die gang. Eerstens spog hulle nou met ‘n volwaardige dames-hengelspan wat hulself die “Galjoen Divas” noem. Hulle het vanjaar weer eens aan die 5-spesies hengelkompetisie te Struisbaai deelgeneem. Hulle is Bertha du Toit, Liezl Myburgh, Colleen de Kock, Karen Hoogendijk, Joanne Bester en Jaenette De Kock.
“Al het die Galjoen Divas nie baie goed gevaar nie, was daar geen tekort aan hulle sportmansgees nie,” vertel Isolde Smith. Isolde se hengelstorie vir die week handel oor hulle afgelope maandelikse hengelkompetisie. “Daar was 14 hengelaars wat ‘n totaal van 84.2kg vis ingeweeg het,” sê sy. Wikkie van Dyk het die swaarste Galjoen van 2.2kg gevang, met Hannes Smuts wat sy volle kwota kabeljou gevang het - ‘n totaal van 5 pragtige visse waarmee hy die 1ste plek behaal het.
Hy het ook pryse vir die swaarste sak (27.7kg) en die grootste vis (8.4kg) gewen. “In totaal is 4 galjoene, 16 kabeljoue, 2 stompneuse, 2 hotentotvisse en 1 kolstert gevang,” sê Isolde. “Dan noem ek vroegtydig van ons Interklubkompetisie wat op 3 Mei aangebied gaan word, met 5 hengelklubs wat gaan deelneem.”
Navrae rakende Pearly Beach Hengel- en Ontspanningsklub (rots- en strandhengel) kan aan Isolde Smith by 084-320-8613 gerig word, of stuur ‘n epos aan haar by drewsolde@omail.co.za.
Hardus Botha
Hannes Smuts met sy vol kwota kabeljoue waarmee hy die 1ste plek behaal het, asook pryse vir die swaarste sak en grootste vis gewen het.
