Die wegspring van ‘n vorige gesellige “Fun Walk” by Gansbaai OK Foods, hierdie keer ten bate van De Kleine Gansies (Argieffoto: Gansbaai Courant)
‘n “Fun Walk” vir die bewusmaking van fiksheid en algemene gesondheid word vir Saterdag, 3 Mei 2014 beplan.
“Soos die vorige keer, sal hierdie staptog weer eens vir groot pret sorg, met die fondse wat vanjaar ten bate van De Kleine Gansies Kleuterskool sal wees,” vertel Jackie Lombaard. Die inisieerders van hierdie pretstappe is Pieta Botes van Xtreme Fitness, Gansbaai OK Foods en Jackie Lombaard (voorsitter: De Kleine Gansies).
Jackie sê die staptog begin om 10:00 by Xtreme Fitness (bokant ABSA), met die inskrywings wat reeds om 09:00 begin. Inskrywingsvorms is by Xtreme Fitness (gym), De Kleine Gansies Kleuterskool en dr Rigardt van Huyssteen beskikbaar. Die roete strek vanaf Gansbaai OK Foods se agterste parkeerarea, af na Gansbaai Karavaanpark en dan kuslangs tot by Stanford’s Cove en weer terug. Waterpunte sal langs die roete deur drs HC & KA Barnard Mediese Praktisyn, Blue Goose restaurant, Xtreme Fitness en De Kleine Gansies geborg word, met Gansbaai OK Foods wat weer vir smaaklike verversings en ‘n lafenis by Stanford’s Cove sal sorg.
“Wanneer die deelnemers terug is by Xtreme Fitness, begin die werklike pret met die tema ‘Wat maak vir Gansbaai lekker?’,” sê Jackie. “Die pryse en spesiale pakkette sal ook dan aangekondig word.” Kostes vir deelname beloop ‘n skrale R20 per deelnemer en dit is ten bate van De Kleine Gansies Kleuterskool.
Vir meer besonderhede kan Pieta Botes by 072-409-6732 geskakel word, of skakel vir Jackie Lombaard by 076-873-4386.
Hardus Botha
