“Dit is met groot dankbaarheid dat ons kan terugkyk na ons NG Kerk basaar wat verlede Saterdag plaasgevind het,” sê Petrus du Preez, sameroeper van die basaar. “Die gees van welwillendheid wat daar geheers het, die vriendelikheid, Eddie Barnard se baie mooi musiek en sang, en dan bowe-al die pragtige weer wat ons Vader vir ons gegee het, was regtig die kersie op die koek.”
Pearly Beach gemeente het die pragtige bedrag van byna R74,000 ingesamel, met groot dankbaarheid teenoor almal wat hard gewerk het, asook die groot hoeveelheid besoekers wat die basaar ondersteun het. “Ek kan nie genoeg dankie sê aan almal wat so hard gewerk het, terwyl hulle bly glimlag het en ek kan nie eers name noem nie, maar net ‘n baie groot dankie aan almal sê.” Petrus meld graag die name van past Frikkie en Mariëtte Zeelie van Gansbaai AGS-gemeente, asook rdl Dudley Coetzee, wat nie eers lidmate is nie, maar bankvas agter die pannekoektafel gestaan het.
“Sowat 2,000 pannekoeke is gebak en ons is dankbaar dat ons oor kerkgrense heen kon saamwerk tot eer van ons Hemelse Vader om ‘n sukses van die basaar te kon maak,” het Petrus gesê. Hy sê die wenners van die verskillende pryse was soos volg: Skaap - Hannes Smuts van Grabouw; 3 kg wors - Riaan Kröger van Bellville; Braaipakhoender - Carine de Kock van Pearly Beach; Die swartwoudkoek - Madelein Nieuwoudt van Clanwilliam. “Baie geluk aan die wenners - geniet julle pryse!” Petrus sê dit was baie gepas dat dit die daaropvolgende Sondag Madelein se seuntjie se verjaardag was en die wenkoek het dus baie handig te pas gekom. “Ons sal nou reeds begin om 2015 (DV) se basaar te beplan,” sê Petrus.
Hardus Botha
“Hoeveel pannekoeke nóg?” - Rdl Dudley Coetzee (regs)
