'n Vissersboot in aksie tydens die onlangse sardynloop in De Kelders se omgewing
Gansbaai beleef tans 'n groot sardynloop wat die skool tot selfs in die Ou Hawe laat inkom het. "Ek is al 60 jaar in Gansbaai en werk elke dag in die hawe, maar dit het ek nog nooit sien gebeur nie - 'n sardynskool in die hawe - ongelooflik," het Flip Fourie, ingenieur van Gansbaai Marine, Dinsdag gesê. Dit is ook skeptyd vir die hengelaars op die hawemuur en die dolfyne net buite die hawe. Pelagiese trawlers het Sondagaand en Maandagoggend op Walkerbaai, reg voor De Kelders van so ver as die Weskus toegesak. Op een stadium het sewe bote gelyk hul nette in die water gehad. Dit was 'n skouspel, aangesien dit so naby was dat inwoners en toeriste alles kon gadeslaan. Volgens die bestuurder van Gansbaai Koöp Visserye, Manie van Dyk, loop die vis dik en is dit van 'n goeie gehalte.
Twee "sardyn-jagters" op die hawemuur, Andrew Fourie en Niel Witbooi
Dinsdag het dit na 'n "sardyne-jag" vanaf die nuwe hawemuur gelyk soos wat almal sardyn gevang het - met die sardyne aan die hawe-kant van die muur.
Francois de Jongh
