Positiewe verslae word steeds vanuit die geledere van Uilenkraalsmond Buurtwag ontvang. Onder andere is die geïnstalleerde kamera’s, wat gereeld verskuif word, beslis ‘n wenner. Sodra die kamera afgaan, word ‘n sein na die 24-uur selfoonnommer gestuur. Inbrake word ook steeds hokgeslaan, met die nuutste een waar ‘n duikpak gesteel is. “Toevallig terwyl die polisie daar was, is geluide gehoor en die duikpak is binne 15 minute deur die Buurtwag teruggekry, maar die kwaaddoener het ongelukkig weggekom,” vertel Paul Venter, koördineerder van die Buurtwag. Verdere goeie nuus is dat die wassery-gebou nou vir die Buurtwag beskikbaar gestel is.
“Die gebou is ideaal vir ons maandvergaderings, samesprekings en beplanning, terwyl dit ook skuiling teen wind en weer aan kliniekpasiënte bied,” sê Paul. Kennis kan ook geneem word van ‘n “voorstelle-houer” wat aangebring is waarin inwoners enige voorstelle en/of die aanmelding van ongerymdhede kan plaas. Hy vertel ook van hulle dankbaar-heid dat ‘n warm jassie vir die koue nagte vir die gholfkar aangekoop is, asook ‘n 2,500,000 kers-krag-lig wat geïn-stalleer is. Die op-en-wakker Buurtwag bestaan tans uit 22 lede, waarvan 7 dames is. Aldus maandverslae wat voorgelê is, word daar noukeurig en in detail rekord gehou van inbrake wat plaasgevind het, suksesse wat behaal word, gesteelde goedere wat teruggevind word en inhegtenisnames wat plaasgevind het. Huisies wat tans by die oorhandiging van donasies betrokke is, beloop sowat 220 en huisies met Buurtwag-kentekens sowat 230.
Die selnommer wat vir aanmeldings geskakel kan word, is 072-947-6147. Ter ondersteuning van en/of borgskappe aan Uilenkraalsmond Buurtwag, kan Paul Venter by 076-795-1698 geskakel word.
Hardus Botha
