LSG se Graham Stieger verruil Gansbaai vir Abu Dhabi
Dit was ‘n moeilike besluit vir Graham Stieger van Laerskool Gansbaai en sy eggenote, Emeke van Masakhane Primary School gewees. Die besluit is egter geneem en die egpaar beoog om later saam met hulle kinders permanent in Abu Dahbi te gaan woon.
“Ek en Emeke gaan elke 4-maande hersien wat volgende gebeur, maar ons reël niks definitief op hierdie stadium nie,” vertel Graham. “Ek vlieg alleen en sal teen die einde van die jaar vir ‘n kort vakansie terugkeer, waarna die volgende besluit geneem sal word.” Graham sê hulle doen dit op hierdie wyse om nie hulle kinders op skool te ontwrig nie. Hulle dogter, Nel (15) is in Gr 10 en hulle seun, Stefan (14) is in Gr 8 in Hermanus Hoërskool.
Graham het in 2012 aanvanklik net vir ‘n jaar onderwys by Laerskool Gansbaai gegee. Kort voor COVID het hy in 2019 teruggekeer, maar maak nou op 31 Augustus 2022 finaal klaar. Laerskool Gansbaai se skoolhoof, Jonathan Doyle, het gesê: “Vir ons was dit onverwagse en hartseer nuus, maar ons wens hom alle voorspoed toe met sy nuwe avontuur - vir die Gansies is dit ‘n groot verlies en vir die Emirates ‘n groot wins.”
Graham vlieg op 2 of 3 September 2022 eers na Dubai. Daarvandaan vertrek hy na Abu Dhabi. Daar gaan hy Ekonomiese Bestuurswetenskappe aan Gr 5-7 leerders onderwys gee. Abu Dhabi is die hoofstad van die United Arab Emirate en is die tweede gewildste stad naas Dubai. “Ek beskou hierdie verandering in my lewe as ‘n groot uitdaging met nuwe horisonne,” het hy gesê.
“Ek wil graag my dank en waardering teenoor Laerskool Gansbaai oordra vir die geleentheid wat ek gehad het om in ‘n puik skool deel van die personeelkorps te kon wees,” het Graham gesê. “Vir my was dit ‘n groot voorreg!” Hy sê hy het ook groot waardering vir die stewige fondasie wat Laerskool Gansbaai vir Stefan en Nel gelê het. “Ons kon nie vir ‘n beter laerskool gevra het nie en ek sal altyd dankbaar daarvoor wees.” Graham sê Gansbaai se gemeenskap sal ook altyd ‘n spesiale plekkie in hul harte hê - die egpaar is al sowat 15 jaar deel van Gansbaai, met Emeke wat al vir 14 jaar by Maskahane Primary onderwys gee. “Ek gaan my Gansie-kiddies en my Gansie-familie ongelooflik baie mis! Met die woorde van Albert Einstein groet ek julle almal: ‘Verbeelding is baie belangriker as kennis, maar kennis gee vir ons mag!’
Sjoe, wat ‘n blitsige onderhoud met ‘n besige man wat alles voor sy vertrek na Abu Dhabi in orde moet kry - sommer so by een van Gansbaai OK Foods se kassierstoonbanke. (Dankie Chris van Rensburg, al het jy nie eers hiervan geweet nie!)
