Tergende geheim van ‘Elsa on the Run’ is opgelos
-Elsa is toe...Skoolhoof Jonathan Doyle-
Laerskool Gansbaai se konsert, Elsa on the Run, is verlede week goed deur die onderskeie gehore ontvang en was ongetwyfeld ‘n baie groot sukses. Maandag, 26 September 2022 is ‘n spesiale en gratis vertoning aan die inwoners van die onderskeie Tehuise vir Bejaardes aangebied, wat terdeë deur hulle geniet en waardeer is - sekerlik met verlange na hul eie skoolkonserte van ‘many moons ago’! Die Gala-aand, ingesluit ‘n smaaklike ete, het uiters gesellig verloop, met luide applous vir die toneelspelers, gepaardgaande met flitsende kameras.
Die hoofkarakters tussen elke toneel, het die gehoor se harte gesteel. Anna (Riané Uys) het bekommerd na haar suster, Elsa, gesoek. Die terggees, Balloo (Ciske Kok) en die pierewaaier, Woody (Arnold Swart) het ewe hard help soek. Links op die verhoog het die pragtige Ursula (Bronwen Casteling) met haar tentakels ‘n wakende ogie oor alles gehou. Regs het die meermin-skoonheid, Ariel (Anje Walker) gesit.
Die eintlike ‘hoofkarakter’, Elsa, is nóóit gesien nie, hoe dan anders, ‘sy’ was mos ‘on the run’. Toe ‘sy’ uiteindelik teen die einde van die konsert gevind word, het ‘sy’ probeer om met die ‘fynste’ ou treetjies (ietwat wankelrig op die hoë hakke!) die verhoog te betree. Julle sal nie glo wie Elsa toe is nie - Skoolhoof Jonathan Doyle! In die rol van Elsa was hy uiters netjies geklee in ‘n ‘boutique’-uitrusting en gegrimmeer soos ‘n wafferse model, met die gehoor wat heerlik oor ‘Elsa’ se verskyning geskaterlag het! Nog meer verrassend, daar hanteer ‘Elsa’ toe sommer ook die bedankings en afsluiting van die prestige Gala-aand.
Wat treffend was van die konsert, is dat elke graad op die verhoog kon optree - met die dames- en manspersoneel wat nie uitgesluit is nie - bravo aan die leerders én personeellede én ouers wat almal betrokke was met die voorbereiding van die konsert. Temas wat gebruik is, is The Jungle Book, The Lion King, Toy Story, Madagaskar, The Little Mermaid, Shrek, Sonic, Shake it Off, Cars, Dance MonkeyTroll’s (damespersoneel), Moana, Sky full of Stars, Zootopia en Frozen (manspersoneel).
Lorraine Kok het die konsert geskryf en die hoofkarakters afgerig - met vele hande en harde werkers (onderwysers en ouers!) wat vir die dekor, musiek, beligting, organisering, Gala-aand-ete en veel meer gesorg het.
