Die groot span rose, ingesluit 2 dorings, wys hier hoe word daar bontgestaan wanneer koeksisters gebak word
Herberg-aan-See se gewilde en jaarlikse basaar is op hande. Die laaste hardlope word nog deur vrywillige werkers gehardloop en vlytige hande skarrel vir oulaas rond om seker te maak alles sal in plek wees. Die gewilde wit-olifanttafel, tombola-items en naaldwerktafels sal weer eens ‘n groot verskeidenheid van items “spotgoedkoop” beskikbaar stel. Die verskeidenheid van koeke en terte van alle denkbare vorms en geure sal besoekers laat toustaan, om nie van die nagereg, etes op die verhoog en veel meer te praat nie. Van die laaste gebak-en-gebrou was onder andere dosyne koeksisters - “crispy” en stroperig wat die mond laat water. Die spreekwoordelike tafel is gedek en elke sent wat spandeer word gaan aan Herberg-aan-See vir brood-broodnodige fondse waarsonder die tehuis nie op ‘n gesonde vlak bedryf kan word nie. Wees vroegtydig daar…wanneer dominus amen sê, is sommige sakke al volgepak. Laaste nippertjie navrae kan aan Francia van Dyk by 028-384-0262 of 082-551-3613 gerig word.
Die basaar open Saterdag, 21 September om 10:00 in die Pretoriussaal.
Hardus Botha
