Basaar dankbaarheid

“Herberg-aan-See wil nog eens vir elkeen wat so mildelik bygedra het, dikwels selfs uit die te min wat  hulle reeds het, baie hartlik en opreg bedank,” sê Francia van Dyk, organiseerder van die pasafgelope basaar ten bate van Herberg-aan-See.

“’n Groot dankie aan elkeen wat die basaar kom ondersteun het en die tafels behoorlik leeg gekoop het.” Sy bedank ook graag die gemeenskap wat al hul familielede in die gure weer saamgesleep het basaar toe, asook die vele besoekers wat die basaar so goed ondersteun het. “Veral ook ‘n groot dankie aan almal wat vooraf met die kollektelyste in die winter, wat ons almal bygekom het, moes loop vir bydraes, asook aan almal wat gebak, gekook, gemaak en ge-wat-ookal gedoen het, té veel om op te noem. Nogmaals dankie uit ons harte uit.”

Hierdie gewilde basaar lewer jaarliks ‘n enorme bydrae tot die Tehuis se bedryfskostes waarsonder daar nie klaargekom kan word nie. Die organiseerders, werkers, bestuurder, personeellede, Beheerliggaam en veral die bejaardes, loop jaarliks oor van dankbaarheid vir die suksesse wat behaal word, ondanks moeilike ekonomiese omstandighede waarin almal gedompel is.

Vir navrae oor en/of bydraes ten bate van Herberg-aan-See Tehuis vir Bejaardes, kan die bestuurder, John van Rooyen by 028-383-0501 geskakel word.

Hardus Botha