Die bekende Elim Tehuis vir intellektueel- en liggaamlik gestremde persone. Foto: Elim Home Jaarverslag 2012/2013
Die bekende Elim Tehuis vir intellektueel- en liggaamlik gestremde persone te Elim vier vanjaar hul 50ste herdenking. Dit is sonder twyfel ‘n groot gebeurtenis wat nie misgeloop moet word nie. Die vol program begin reeds op Vrydag, 11 Oktober en duur voort tot Sondag, 13 Oktober. Vrydagaand om 21:30 word daar met ‘n straatoptog vanaf Annex onder musiekbegeleiding begin, op pad na die Morawiese Kerk Elim, waar sprekers, musiek en verversings op die optoggangers wag.
Audrey Ludoph, Andrew Arends en Joanne Swart
Om 23:30 sal ‘n Middernagdiens gehou word. Saterdag om 08:30 is daar weer ‘n straatoptog met motorfietsryers, trompoppies en veel meer en om 10:00 vind die amptelike opening en verwelkoming plaas. Daarna wag net pret op die besoekers: plaaslike Idols, die gewilde Marimba Band, dansers, perdry, gesigverf vir die kinders, musiek en veel meer om net voluit te geniet. Daar sal genoeg stalletjies wees met ‘n verskeidenheid van items wat gekoop kan word, ‘n verskeidenheid van smaaklike en ook interessante disse, asook ‘n braai en potjiekos. Sondagoggend is daar weer ‘n straatoptog vanaf Elim Tehuis na die Kerk, waar ‘n Dankseggingsdiens om 10:00 gehou sal word. Die feestelikhede te Elim duur daarna vir die res van die dag voort. Toegangsgelde beloop ‘n skrale R20 vir volwassenes en R5 vir kinders.
Navrae kan aan 028-482-1988/1876 gerig word, of stuur ‘n epos aan elimhome@zsd.co.za.
Hardus Botha
