Strandskloof Park doen dit wéér
En toe doen Strandskloof Park van Tot en Isabel Fourie dit vir die soveelste keer om met die louere van ‘n prestige toekenning in die Wes-Kaap weg te stap. Hierdie keer van LekkeR Kampplekke: The Winner for the Best Resort in the Western Cape for 2024. Soortgelyke prestige toekennings is ook in 2015, 2016 en 2018 deur die egpaar Fourie en hul personeellede ingepalm, met pragtige geraaamde sertifikate, asook trofeë om op trots te wees.
Die ‘gewone’ plaas van voorheen is met ‘bloed en sweet’ deur Tot en Isabel in ‘n lushof omskep, vandag bekend as Strandskloof Park (Karavaankamp). Hulle is beloon vir hul harde werk met die amptelike opening van die oord op 3 September 2010, sowat 14 jaar gelede. Sedertdien het Strandskloof net van krag tot krag gegroei tot wat dit vandag is. In die karavaanpark kan mens “voel” hoe staan jy in die natuur en midde in Strandveld, met die berg en veld agter jou en Die Gruis se duine wat voor jou teen die Atlantiese Oseaan lepellê. Groen grasperke, natuurskoon en absolute netheid is die besoeker se eerste indrukke.
Naas die bekende karavaanstaanplekke en ablusieblokke, het netjiese vakansie-huisies intussen bygekom. Daar is ‘n verskeidenheid van ontspannings-aktiwiteite vir kampeerders, soos ‘n gerieflike saal, warm- en koue swembaddens, 4 x 4 hindernisroete, speelarea, ‘jungle gym’, ‘putt-putt’ bane en baie meer. Die oord is veral baie gewild onder karavaanklubs wat gereelde saamtrekke daar hou, met gereelde jeug- en ander feeste wat daar aangebied word.
Om Strandskloof Park te besoek, is om te verstaan waarom soveel prestige toekennings al deur hulle ingepalm is - sonder twyfel ‘n groot aanwins vir die Gansbaai-omgewing.
Hardus Botha
prev
next
