Dis nou nie manne wat Moedersdag vir hulself opeis nie, maar manne wat besluit het om die Moeders te onthaal en te bedien. Vanjaar is die tweede jaar wat die Birkenhead Boothengelklub besluit het dís hoe ‘n Moedersdagete aangebied moet word - die manne maak die kos, skep op en bedien die Moeders wat dan met oorgawe onthaal word. Hierdie projek was ook verlede jaar op Moedersdag ‘n reuse sukses - ook deur die manne aangebied. Op Sondag, 11 Mei 2014, het etlike gaste en moeders by die klubhuis opgedaag, met die manne wat hulle vriendelik in swart broeke, wit hemde en kleurvolle serpe met sjerrie ingewag het.
Voorsitter Philip Fourie het as seremoniemeester opgetree en baie spesiaal na veral die geloof van moeders verwys. Dirk en Eva Büchner, ook bootklublede, het gesorg vir hartroerende sang as blyk van waardering teenoor die moeders. Die uitstaande potjiekosse wat te ete aangebied is, was Bees (Steve Muller), Hoender (Dirk Büchner), Kerriehoender (Jan Lotz), Maalvleis/Pasta (Manie van Dyk), Skaap (Bev Swart) en Volstruis (Kobus du Toit), saam met broodjies, konfyt en patè (Stella Swart) en smaaklike malva poeding en vla (Nickie van Dyk) as nagereg.
Anita Botha en ‘n span helpers was verantwoordelik vir die pragtige en gepaste versiering van die klubsaal. Selfs hier was die manne (gesoute hengelaars!) behulpsaam en het die vooraf-uitgeknipte vroue-figuurtjies teen die mure opgesit en gekleurde servette in die wynglase gesit. By die gaste ingesluit was onder andere rdh Pieter Scholtz, ‘n voormalige voorsitter van die bootklub en sy eggenote, Ans. Bev Swart het op sy beurt met 6 uit ‘n gesin van 10 broers en susters opgedaag.
Die Birkenhead Boothengelklub se volgende boothengel-kompetisiedag is op Saterdag, 24 Mei 2014, met hulle gebruiklike en gesellige aandfunksie daarna. Skakel vir Johan Wiese by 084-680-1269, of stuur ‘n e-pos aan hom by johan.wiese55@gmail.com.
Hardus Botha
Foto: Philip Fourie, Johan Wiese, Hardus Botha, Manie van Dyk, Steve Muller, Johan Burmeister, Jan Lotz, Dirk Büchner en Bev Swart
