Die vrolike Birkenheaders van die Birkenhead Boothengel-klub het voortgegaan met hulle maandelikse funksie, ongeag die boothengelkompetisie wat as gevolg van gure weersomstandighede afgelas is.
Die borggeld ten bedrae van R500, wat deur Marie Reid van Marie's Boutique, Art & Beauty Shop geborg is, moes vir die volgende boothengelkompetisie oorstaan. Die smaaklike ete het uit sop as voorgereg bestaan, met die hoofgereg as sappige hamburgers, skyfies en slaai, met sago-poeding as nagereg. Manie van Dyk, ondervoorsitter, het die verrigtinge in die klub se voorsitter, Philip Fourie se afwesigheid hanteer.
Die gebruiklike geluktrekkings is weer eens deur Johan Wiese gereël, met Linda Kloppers wat die trekking van nommers hanteer het. Die gelukkige wenners van die twee bottels wyn was Tollie Thompson en Jan van Zyl.
Raymond Rabe het oudergewoonte sy bekende Musiekfabriek van vroeg af aan die gang gekry en tot laataand vir voetejeuk-musiek gesorg. Die einste Tollie is ook saam met haar eggenoot, John Thompson, gelukgewens met hulle 47ste huweliksherdenking die daaropvolgende Dinsdag, 27 Mei 2014. Kennis moet geneem word dat boothengelkompetisies nie meer noodwendig op die 1ste Saterdag van elke maand plaasvind nie.
Die volgende boothengelkompetisie is vir 14 Junie 2014 geskeduleer, wat die gebruiklike aandfunksie sal insluit. Kompetisienavrae kan aan Johan Burmeister, wedstrydsekretaris, by 082-895-7647 gerig word en Klubnavrae aan Philip Fourie, voorsitter, by 082-747-3634.
Hardus Botha
Foto: Vlnr is Johan Wiese, Tollie Thompson, Linda Kloppers en Jan van Zyl na afloop van die gelukstrekking tydens die Birkenhead Boothengelklub se maandelikse funksie. Foto: Linda Kloppers
