Annelize Zeelie van Fynbos Akademie, sowat 20km vanuit Stanford, vertel van ‘n pragtige pop-breiwerkprojek wat deur Moira Beeton en haar dogter, Yvonne Bauermeister van die Ladies Active in Stanford aangepak is.
“Dié twee dames het die allermoooiste popklere gebrei en gemaak vir die poppe van die grade R en RR kindertjies van ons skooltjie. Dit is iets wat mens sukkel om in die hande te kry - 'n kuns wat aan die uitsterf is.” Annelize het haar opregte waardering namens die kinders teenoor Moira en Yvonne uitgespreek. “Die kleingoed is in ekstase!”
Gansbaai Courant het ‘n tyd gelede ‘n berig oor die ontstaan van Fynbos Akademie geplaas. Die Fynbos Community Foundation (FCF) is gedurende 2012 onder plaaswerkers as ‘n nie-winsgewende organisasie geregistreer. Wat gedurende 2011 as ‘n dagsorgsentrum bedoel was, het intussen na ‘n volwaardig laerskool uitgebrei.
Fynbos Akademie vorm die grondslagfase van Laerskool St Paul’s, maar funksioneer onafhanklik en onder toesig en gedeeltelike befondsing deur die FCF. Sy het destyds haar opregte waardering teenoor Koos en Joanie Smith van die plaas Langverwacht uitgespreek.
Vir navrae rakende die laerskool óf die fondsinsamelings-projek waarvoor Koos en Joanie Smith ‘n 1,000km fietstog in die Wes-Kaap aangepak het, kan Annelize by 074-333-4463 gekontak word, of stuur ‘n e-pos aan haar by annelize.zeelie@gmail.com.
Hardus Botha
Foto: Yvonne Bauermeister (links) en haar moeder, Moira Beeton saam met van Fynbos Akademia se kinders
