Dit was weer tyd vir die Gansbaai-motorfietsers, en ander in die Wes-Kaap, vir hul jaarlikse winterbesoek aan Sutherland. Vanjaar was dit die 11de jaarlikse Sutherland Winter Runners 2013 motorfietsrit van die Scattered Links MCC, terwyl dit die 4de een vir Overberg Scattered Links was.
Die 9 Gansbaaiers (verlede jaar was dit 6) van Overberg Scattered Links wat vanjaar se motorfietsrit na Sutherland aangepak het, is hulle voorsitter, Pieter Maree, met die res as André Coetzee, Bennie du Toit, Chris van Rensburg, Du Toit van Sittert, Ettienne Brown, Francois van der Westhuizen, Jannie Vermeulen en Senekal Dreyer. Die Gansbaaiers het op Saterdag, 7 Junie om 06:00 in Gansbaai weggetrek en later by die res van die motorfietsers in Worcester aangesluit. Vandaar is hulle via De Doorns en Matjiesfontein na Sutherland, sowat 400km vanaf Gansbaai.
“Die manne het dit terdeë geniet en vanjaar het ons gelukkig nie weer in sneeu vasgeval nie, al was dit vanselfsprekend maar baie koud gewees,” vertel Pieter. “By Matjiesfontein, wat gewoonlik ‘n langerige stop vir bene-rek is, het ons ‘n baie interessante bustoer deur die dorp gehad - in ‘n toeka se vyftigerjare se bus vanuit London.” Daar was ook ‘n geleentheid vir gelukstrekkings en André Coetzee was die gelukkige wenner van ‘n gratis kaartjie vir volgende jaar. Pieter sê dit was verlede jaar ook ‘n Gansbaaier wat die gelukstrekking gewen het. Vanjaar was daar weer eens so ‘n stuk of 6 nuwelinge wat braaf genoeg was om die laaste ±50 kilometer na Sutherland slegs in hul “coulor-vests”, stewels en onderbroeke af te lê.
“Ons het die terugrit vroeg Sondagoggend aangepak om nie in die reën wat voorspel is, te ry nie,” vertel Pieter. “Daar was welliswaar nie reën nie, maar die wind was só sterk dat ons maar pal skuins gelê het, al het ons reguit gery.”
Navrae oor Scattered Links, Overberg Chapter kan aan Pieter Maree by 083-292-0190 gerig word, of stuur ‘n e-pos aan hom by scatteredlinks.overberg@gmail.com.
Hardus Botha
Foto: Die 9 Gansbaai-motorfietsers kort voor hul vertrek na Sutherland, met voor vlnr André Coetzee, Senekal Dreyer, Jannie Vermeulen en Bennie du Toit. Agter vlnr is Ettienne Brown, Pieter Maree (voorsitter), Chris van Rensburg, Du Toit van Sittert en Francois van der Westhuizen.
