Met verwysing na vorige berigte rakende die vyeboom boorinsek in Gansbaai Courant, meen Eddie Munnik van Pearly Beach Oord dat hy op ‘n teenvoeter daarvoor afgekom het - sy bewyse is die dooie larwes.
Die middel waarna hy verwys, is Sipermetrien, met die volgende twee aktiewe bestanddele: Cypermethrin (Pyrethroid) 200g/l en Sipermetrien (Piretroïed) 200g/l.
“Ek het dié insektedoder sowat 8 jaar gelede by die Paarl se Korporasie gekoop en dit sedertdien vir alle vorme van insekte en peste op my groentes, olyf- en ander bome gebruik, sonder enige newe-effekte,” vertel Eddie. Die vyeboom boorinsek, waarvan hy die artikels in Gansbaai Courant gelees het, het ook sy vyeboom aangeval. Hy het besluit om sy Sipermetrien ook daarvoor aan te wend en is baie tevrede met die effektiewe resultate wat hy bereik het. Sy vyeboom het sodanig herstel dat hy die afgelope seisoen gereeld van die vye moes weggee. ‘n Kennis van hom in die Paarl, wat die gifstof by hom aanbeveel het, het dit met groot sukses selfs op sy granate en kwepers gebruik. Gansbaai Courant het Agri Overberg in Stanford in hierdie verband gekontak, en Myriam Cotton, Kwekery Vloerbestuurder het die navraag aan Ingrid Bedford, Reguleringsbeampte van Efekto gestuur. Ingrid het die volgende gesê: “Die saak is reggestel, indien die produk nog beskikbaar was sou dit Karbasol gewees het wat geregistreer was op die kewers in die algemeen, maar mense moet versigtig wees om nie aanbevelings te maak wat nie geregistreer is vir die doel nie. Wet 36 sal baie streng teen sulke mense optree.”
‘n Afgetrede gifstofkenner het weer eens beklemtoon dat daar nie ‘n spesifieke middel vir die kewerstadium van die vyeboom boorinsek bestaan nie en in Eddie se geval was dit die larwes wat effektief deur sy middel gedood is. Dit blyk egter sonder twyfel dat die middel waarna Eddie verwys, volgens Efekto nie meer vervaardig word nie.
Hardus Botha
Foto: Eddie Munnik van Pearly Beach by sy gesonde vyeboom, met die insekdoder Sipermetrien in sy hande
