Deurmekaar! Dis al manier om die visvangsituasie te beskryf. Soos voorspel was daar darem ‘n paar mooi geelbekke asook ‘n paar bul-kabeljoue -- ons praat van ‘n paar kilo oor die 20. ‘n Paar bote het met groot verwagting die dieper water gaan opsoek in die hoop om tog maar ‘n geelbek of twee te kry, maar so het dit ook nie gewerk nie. Die ouens wat wel suksesvol was was eerder die uitsondering. Dit help darem om te weet die vis is hier rond en soos vroeër voorspel, behoort die eintlike bytslag net om die draai te wees. Hou egter die weer goed dop en moenie kanse waag nie. Die een dag is die weer en die water onverbeterlik en net die volgende dag is dit koes-koes vir die hael en keer vir die wind.
Wat die stokmanne betref is die storie ook maar nie te wonderlik nie. Daar is tog ouens wat met reg kan spog maar op die Gruis byvoorbeeld is daar baie klein galjoentjies waarvan die meeste teruggeplaas moet word. Maar ook die manne met die lang stokke kan maar gereed staan. Gee die weer net kans.
Op ‘n baie onvriendeliker noot. Indien jou boot buite staan, wees asb. versigtig. Daar is by meer as een ingebreek en baie visgoed en petrol het voete gekry. Laat ek hierdie diewe waarsku -- jy moet nie gaan staan en lol met ‘n ou se visgoed nie. Word jy vasgetrap gaan daar groot pêrre wees!
Groete, Seemeeu
Foto: Nee, hierdie mooi hotties is nie nou onlangs gevang nie maar Jannie Roux, Freddie Carse en Steve Serbon kan getuig dat hulle so rukkie terug heerlik gesmul het. Die foto is sommer vir die lekkerkry!
