Stormsee kortwiek hengel

Sterk stormweer, sinoniem met die winterseisoen, het weer eens die afgelope boothengelkompetisie van die Birkenhead Boothengelklub gekort-wiek. Al raak die hengelaars bekommerd oor hulle jaarpunte, het afgelaste kompetisies geen invloed op die gebruiklike funksies daarna nie. Ongelukkig moes die borgskap deur Marie Reid van Marie's Boutique, Art & Beauty Shop weer eens vir die volgende kompetisie oorstaan. Net so ongelukkig kon wedstrydsekretaris, Johan Burmeister, nie afgeneem word nie (‘n hartseer saak vir hom!), aangesien daar geen prysoorhandigings gedoen is nie.

Die klubsaal was weer eens gevul met gesellige, kletsende en dansende klublede en gaste. Raymond Rabe het oudergewoonte vir voete-jeuk dansmusiek met sy Musiekfabriek gesorg. Smaaklike vis, skyfies, slaai en nagereg is voorgesit, met ‘n heerlike broodtafel vooraf. Klublid Thys Fourie het vir ekstra geselskap gesorg deur sy dogter, Annette Fourie en Benet Botha van Belville saam te bring, asook Marie Reid se 40-jaarlange vriende/werk-nemers, Paul en Magriet Adams van die Paarl. Dus ‘n gesellige tafel van kennisse, soos dit ook die gebruiklike geval is met ‘n groep Hermanus-vriende wat die klub se funksies gereeld bywoon - alles tekens van genotvolle maandeindfunksies. Die gebruiklike geluktrekking is ook weer deur Johan Wiese gereël, met Margi Muller wat die gelukkige nommers toe-oë moes trek. Die gelukkige wenners was klublid Brain King van Durbanville en Ané Staunton wat vanaf Hermanus kom kuier het.

Die volgende boothengelkompetisie vir die Birkenhead Boothengelklub is vir Saterdag, 19 Julie 2014 geskeduleer, insluitend die gebruiklike en gesellige aandfunksie. Kompetisienavrae kan aan Johan Burmeister, wedstrydsekretaris by 082-895-7647 gerig word en Klubnavrae aan Philip Fourie, voorsitter by 082-747-3634.

Hardus Botha

Foto: Vlnr is die wenners van die geluktrekking, Brain King en Ané Staunton saam met Margi Muller en Johan Wiese