Meer en meer soos Jesus 2

“Julle is die sout vir die aarde. Julle is die lig vir die wêreld. Laat julle lig so voor die mense skyn, dat hulle julle goeie werke kan sien en julle Vader wat in die hemel is, verheerlik.” (Mat 5:13-16)

Die Christendom het amptelik in 313 n.C. erkende status gekry en 381 n.C. met die Edik van Milaan het dit die staatskerk geword. Maar daar is ’n groot verskil tussen die Christendom wat gaan oor instellings en tradisies en jou en my Christenskap wat te doen het met ’n lewende verhouding met Jesus Christus! In die Christendom dink kerk en mense dat hulle outomaties as die bevoorregtes beskou kan word. In die Westerse wêreld is die “Christendom” iets van die verlede. Tradisionele kerke verdwyn al hoe meer en hulle invloed neem af. Kerk toegaan en kerkwees begin verdwyn – en al hoe meer gelowiges soek hulle spiritualiteit in klein groepe en  huiskerke. Maar is dit wat nou gebeur noodwendig slegter as voorheen? 

Vir Jesus het dit nooit gegaan oor kerke en instellings nie. Jesus praat nooit oor kerkwees nie – maar oor Christenskap – om te leef soos Jesus! Vir Hom het “kerk” gebeur wanneer Hy een vir een mens beïnvloed het, of in die geselskap van Sy dissipels  hulle geleer het wat Sy Vader se wil is. Jesus se wandel en omgang met Sy dissipels was altyd gekenmerk deur opregte belangstelling en omgee. Daarom ook Sy woorde wat ons hierbo uit Matteus 5:13-16 aanhaal. Ons is GOD se sout vir die aarde en Sy lig in die wêreld! Waar ons gaan (en nie sit nie!) is ons besig om mense lief te hê met Jesus se manier van liefhê. Ons gesels met die verstotenes en die weduwees, ons lê ons hande op die siekes en ons deel brood uit aan die wat honger is. Ons verkoop ons oorvloed van besittings en deel dit uit aan die armes wat GOD op ons pad stuur. Jesus verwag dat ons met ons ligte sal skyn in mense se lewe wat verward is omdat hulle nie meer GOD raaksien in die wêreld nie. Dit is nie die kerk wat moet skyn nie – maar ek en jy! Daarom sê ek weer: Ons kan nie die kerkbanke warm sit maar buite rondom ons is daar baie mense wat koud kry en honger is omdat ons só besig is met die instandhouding van die Christendom!

Kom my vriend, vriendin, mede-christen, kom uit jou warm huis, jou veilige besigheid en steek uit jou hande na die wêreld daar buite waar Jesus wil hê jy moet getuig – nie met nog ’n preek of kritiek nie – maar met ware liefde en ’n hart wat brand van omgee vir jou broer en suster in nood.  Kyk hierdie week waar jy ’n verskil kan maak in iemand se lewe!