Die survey (ondersoek) van Sport- en Ontspanningsbote, asook kommersiële bote deur ‘n amptelike surveyor (ondersoekbeampte) het ‘n nuwe wending ingeslaan ná die aftrede van Koos de Kock. Koos het voorheen alle bote in die omgewing ge-survey, wat dit baie gerieflik vir booteienaars gemaak het. Die foon kon net opgetel word en ‘n afspraak kon met Koos gemaak word. Voortaan moet booteienaars met SAMSA (South African Maritime Safety Authority) die nodige reëlings tref. ‘n Ondersoekbeampte word dan van die Kaap af gestuur, maar dan moet ‘n minimum van 5 bote ondersoek word. “Dit is wat dit vir ons moeilik maak, maar ek is bereid om as koördineerder op te tree sodat ons ‘n groep bymekaar kan kry vir die ondersoekbeampte vanuit die Kaap,” sê Piet van Zyl.
“Ek is steeds die amptelike Veiligheidsoffissier en Ondersoek-beampte van die twee boothengelklubs, Overberg Boothengelklub en Birkenhead Boothengelklub en kan dus steeds hulle lede se bote survey, maar nie bote van eienaars buite die twee klubs nie,” sê Koos. Hy is sedert 1997 deur SAMSA as amptelike Small Vessel Surveyor aangestel. “Alle betrokkenes is reeds van die situasie in kennis gestel en booteienaars sal voortaan net vroegtydig vir ‘n surveyor met SAMSA moet reël om hul bote te laat survey,” sê Koos. Kennis kan ook geneem word dat Tjaart Olivier in Hermanus ook bote survey, maar dat hy nie na Gansbaai kom om dit te doen nie. Tjaart kan by 028-314-1023 gekontak word. SAMSA se kontaknommer in die Kaap is 021-421-6170.
Belangstellendes wat van Piet van Zyl se bereidwilligheid om ‘n basiese program vir besoeke vanuit die Kaap op te stel, kan hom by 083-309-9493 skakel.
Hardus Botha
