“Julle het gehoor dat daar gesê is: ‘'n Oog vir 'n oog en 'n tand vir 'n tand.’ Maar Ek sê vir julle: Julle moet julle nie teen 'n kwaadwillige mens verset nie. As iemand jou op die regterwang slaan, draai ook die ander wang na hom toe. As iemand jou dwing om sy goed een kilometer ver te dra, dra dit vir hom twee kilometer. Gee aan hom wat iets van jou vra, en moet hom wat van jou wil leen, nie afwys nie.” (Mat 5:38,39,41,42)
Dit is darem nie lekker as iemand jou beledig of seermaak nie, nê? Ons eerste reaksie is om iemand te wil “terugkry”. Dit soos wanneer kinders baklei en mekaar die hele tyd wil “terugkry”. Dit was ook wat die gelowiges in die Ou Testament geglo het as hulle die beginsel lees van ‘'n Oog vir 'n oog en 'n tand vir 'n tand.’ As iemand jou skade berokken het, kon jy hom daarvoor “terugkry”. Dit is so asof jy altyd die laaste hou wil inkry, of die laaste sê sê.
Jesus wys ons in hierdie gedeelte van die Bergpredikasie dat Sy volgelinge anders moet optree is sulke situasies. Hy maak die nodige regstelling op hierdie Ou-Testamentiese beginsel van reg wat moet geskied. As Christene moet ons die kringloop van mekaar “terugkry” verander met Jesus se liefdesbeginsel. Doen goed aan mekaar deur mekaar lief te hê. Wees bereid om selfs jou ander wang te draai as iemand jou op jou regterwang sou slaan. Dit beteken dat jy vir hom wys dat jy hom net daar en dan vergewe en nie langer met die argument wil aangaan nie. “As jou vyand honger is, gee hom iets om te eet; as hy dors is, gee hom iets om te drink; want deur dit te doen, maak jy hom vuurrooi van skaamte.”
(Rom. 12:20)
In die fliek oor Ghandi se lewe reageer hy ook oor die opmerking dat ’n oog vir ’n oog geneem moet word. “’n Oog vir ’n oog sal net daarin slaag om die hele wêreld blind te maak!” Daar is genoeg haat in die wêreld sonder Jesus daarin. Wanneer ons Jesus in ons lewe innooi wil jy soos Jesus optree. Dit is waar dat mense wat jou beledig en slaan jou seermaak. Maar jy hoef nie vanuit jou seerkry te reageer of antwoord nie. Doen die Jesus-ding: Reageer vanuit die krag van liefde. Ons moet liefhê selfs al verdien ander dit nie. Ons sal alleenlik ’n verskil kan maak as ons leer om alles wat ons doen met Jesus se liefde in ons te doen. “Daarom is ek bly oor swakhede, beledigings, ontberings, vervolging en moeilikhede ter wille van Christus, want as ek swak is, is ek sterk.” (2 Kor. 12:10)
