Elim Home vra hulp

“Ons fondse het skraps geraak en ons wil graag die agterplaas van Elim Home gelyk en mooi maak,” vertel Jo-Anne Swart van Elim Home. “Daarvoor benodig ons dringend donasies vanuit die gemeenskap.

Elim Home is ‘n woning vir kinders en jong volwassenes met ernstige intellektuele en fisiese gestremdhede en is in 1963 in Elim gestig. Hulle is bewus van kinders in die Overbergstreek wat sonder gemeenskapssorg is. Met die hulp van Klinieke en Maatskaplike werkers is begin met uitreikgroepe in Gansbaai en Stanford gedurende 2006. Aanvanklik is begin met 10 kinders in Gansbaai en 3 kinders en 4 volwassenes in Stanford. Dan sien hulle ook om na heelparty jong kinders vanaf die ouderdom 2 jaar in Gansbaai, met goeie resultate met terapetiese- en stimulasieprogramme wat weekliks aangebied word.

As gevolg van die resultate en nood, is ‘n dagsorgsentrum in Gansbaai Toerisme se konferensiesaal begin, wat deur 3 ouers en Elimpersoneel bedryf word. Finansiële ondersteuning is deur MAMMAS Africa en die departemente van Gesondheid en Maatskaplike Ontwikkeling verskaf. Vir hierdie en ander projekte, asook uitbreiding in Gansbaai en Stanford, is die ondersteuning deur die gemeenskap en besighede onontbeerlik.

Vir navrae en ondersteuning, asook vir bydraes ten opsigte van die bovermelde versoek, kan Suster Cunningham of Jo-Anne Swart van Elim Home by 028-482-1988 geskakel word, of stuur ‘n e-pos aan hulle by elimhome@zsd.co.za.

Hardus Botha

 ‘n Vrolike optog tydens ‘n vorige Opedag te Elim Home (Argieffoto)