Dit moes ‘n brawe man gewees het wat laas week dit op die see gewaag het. En het jy dit wel gedoen was daar nie veel te wen nie.
Die naweek gepraat met ‘n hengelaar wat twee keer ‘n jaar in Namibië (die ou Suidwes klink vir my steeds meer “reg”!) gaan hengel. Ek het dit voorheen gesê, en gaan dit weer doen -- indien jy nie een keer in jou lewe daarheen is om te gaan hengel nie, sal jy altyd iets kortkom. Ek self was net een keer daar, gelukkig toe met my familie en sal altyd dankbaar bly dat ek daartoe in staat was.
Wat kan ‘n man nou oor die area sê wat nie welbekend is nie? Lees bietjie waaroor ek die naweek gesels het en kyk of jy nie ook lus voel vir lippe aflek nie. My vraag aan hom was of daar nog steeds baie vis is en of dit nog die moeite werd is. Sy antwoord aan my was om te verduidelik hoe dit die vorige keer gegaan het, en sê, hy, hulle plek is reeds bespreek vir later hierdie jaar. Elkeen in dié groepie het hulle eie taak om te verrig en syne is blykbaar om van die gereedskap en ander goed te verskuif en gereeed te hou -- en te help vis skoonmaak. Soms gebeur dit dat hulle die een dag baie en massiewe kabeljoue vang. ( Hy skets hierdies wat met sleepsterte gedra moet word) Dié moet natuurlik die aand nog, skoongemaak word. Almal van ons wat lief is vir hengel weet ook dat dit nou nie van die aangenaamste take is nie. In elk geval het hulle reeds hul kwota kabeljou gevang en dus is die besluit dan om die volgende dag vroeg in te val maar om te konsentreer op galjoen. Daarvan sê hy het hulle ook baie gekry, maar snaaks genoeg, was hierdie vis oor die algemeen nie baie groot nie.
Sy mening is dat die heel grotes nie daar rond dwaal nie. Hieroor het ek ‘n ander opinie gehad, aangesien ek toe ek daardie tyd daar was, juis gespog het oor die baie bulle.
Ons het ook baie gepraat oor die verskeie vangplekke en maniere wat aangewend word. Wie weet nie dat galjoen baie maal vlak wei nie? Hy vertel my toe van hierdie een plek waar hulle glad nie ingooi nie maar net die lyn aan die stok se punt vasmaak en die lyn dan in die water laat sak. Só vlak is nuus vir my! Daar is mos baie hengelaars hier by ons wat tog die kans gebruik en selfs die wat gereeld hierdie kus besoek. So het die ou my ore aangesit?
Finansies is gewoonlik die groot problem en om twee keer ‘n jaar soontoe te gaan is nie vir almal beskore nie, probeer tog net vir hierdie één keer. Ai tog.
Groete, Seemeeu
