Ons het ’n probleem in ons land. Dieselfde probleem kom in baie ander lande voor. Hier is die probleem: Kinders het nie meer respek vir hulle ouers en vir onderwysers, ouer mense en vir gesag nie. Luister jy maar gerus hoe baie kinders met hulle ouers praat – om nie eers te praat van hoe hulle agteraf teenoor hulle maats van onderwysers, hulle ouers en ander mense praat nie! Ons noem dit ongedissiplineerde gedrag – of bloot ’n totale disrespek vir gesag. Die resultaat is kinders wat misdadigers word – al steel hulle nie, het hulle geen respek vir ander mense nie!
Waar lê die oorsaak van die probleem? Beslis nie net nie by die kinders nie. Die skuld moet voor die deur van ons as ouers gelê word. Waar ’n ouer toelaat dat sy kind sy sin in alles kry, of nie toesien dat die kind met streng dissipline grootword nie, gaan jy ’n kind kry wat vir niks of niemand respek het nie. O ja, by die skool, of voor ander mense mag hulle nog beskaafd optree, maar as hulle by die ouerhuis kom, is hulle onbeskof en ongehoorsaam – en die ouers moet hiervoor tot verantwoordelikheid geroep word. GOD se Woord is duidelik: ’n Vader moet sy kinders streng behandel. (Spr. 19:18) (Tugtig of straf sê van die Bybelvertalings). Streng behandel beteken dat jy hulle leer om volgens GOD se Woord te lewe – dat hulle sal weet wat die Bybel sê en daarvolgens lewe. Lees jou kinders nog hulle Bybel? Ken hulle die Woord? Dit is en bly ons as ouers se verantwoordelikheid om ons kinders met die Bybel groot te maak. “ Hierdie gebooie wat ek jou vandag gegee het, moet in jou gedagtes bly. Jy moet dit inskerp by jou kinders en met hulle daaroor praat as jy in jou huis is en as jy op pad is, as jy gaan slaap en as jy opstaan. Jy moet dit as herinneringsteken vasbind aan jou hande, en dit moet 'n merk op jou voorkop wees.” (Deut. 6:6-8)
Ons kinders is ons kosbaarste besittings. Daarom moet ons hulle ook opvoed soos wat GOD van ons verwag. Die eerste ding wat ons in ons huise moet terugbring is die Bybel. Die tweede ding wat saam met die Bybel gaan is dissipline, of tugtiging. Verstaan nou mooi – tugtiging is altyd gevul met liefde. ’n Goeie pak slae op sy tyd is die beste geskenk wat ’n pa vir sy seun kan gee. Dissipline is liefde. Respek vir all mense is liefde. Gee jou kinders die beste liefde wat jy het: Leer hulle respek vir hulleself, vir hulle ouers en alle mense!
