Dit mag lyk asof julle Saterdae, hou vir hou alleen, op die veld moet verskyn maar julle moet glo dat die Baai nog bankvas agter julle staan, manne.
Met nog weer 'n stamp agter die rug en die Baai stik nou behoorlik aan sy eie blare. Die ouens het verlede Saterdag hul wedstryd teen Genadendal, kom ons sê nie verloor nie, maar vir die soveelste maal weggesmyt. Lat dit maar swaar op die oor val.
Black Leaves, die doellyn sit nie langs die kantlyn nie, nou wat wil ons vir mekaar sê, reguit hardloop met die bal in die hande, anders kan geen vorm of fases van rugby gespeel word nie. Wat hieruit spruit is dat nie 'n bal aangegee kan word nie.
Sal 'n mens dit regtig kop toe vat dat Black Leaves se opponente hulle nie meer reken as 'n gevaar nie? Die span van Black Leaves is so ingestel dat hulle hulle alweer klaar voorberei om die magtige SAFCOL van Grabouw van die appelbome te gaan afspeel. Black Leaves met sy betreklik jong span gaan die een of ander tyd op vorm kom. Dit herinner aan 'n span van die 90's wat reeds die Baai gebring het tot binne die Premier Liga. Hier dink 'n mens aan ouens soos Jaun Lewis, Gordon, Koppe, Frank, Boetie Bud, Kinne, Apie, Andrew, Karra, Trol, Eli, Sampie, Speedy, Pieter Jantjies, Sammy, Piet, Jacquie, Hein, Daniel, Jason en Lood. Dit was ouens wat pak gevat het maar het die pad oopgespeel vorentoe. Julle genoemde ouens, kom help man. Kan die Baai nie maar Saterdag al sy nonsens laat staan en SAFCOL gaan opvoeter nie. Die Waratahs het dan met die Crusaders so gemaak.
So sê Bra "G"
