Vir twee brandweerwaens, loeiende sirenes, geraas-toeters en flitsende rooiligte is dit nie moeilik om kleuters se aandag vas te vang en te behou nie. So was dit dan ook op Vrydag, 15 Augustus 2014 by De Kleine Gansies Kleuterskool, Cool Kids Kleuterskool en Masakhane Créche.
“Tydens ons Mandela-dag optrede by hierdie drie kleuterskole het ons keuses van prente om in te kleur aan die kleuters uitgedeel en belowe dat daar ‘n wenprys vir elke skooltjie sal wees,” vertel Jacques van Lill van Gansbaai Brandweer. “Die drie wennertjies is deur ons keurders aangewys en vandag het ons die pryse persoonlik gaan aflewer.” Die groep brandweermanne en -vroue het met twee brandweerwaens onder leiding van Jacques na die kleuterskole gery en die wenpryse oorhandig. Jacques sê etlike kleuters het met hulle vorige besoek gevra of daar “tannies” ook in die Brandweer is en derhalwe is twee brandweervroue, Cynthia Desemela en Patricia Snyders saamgeneem. Die res van die span was Alpheus Mohlabi, Bavan Hess en Thembelani Xovula.
Die wenprys is ‘n pragtige brandweer-speelstel, kompleet met ‘n brandweerwa en -helikopter en -toerusting. Die wenners was Elizna van Rensburg (De Kleine Gansies Kleuterskool), Johanay Michau (Cool Kids Kleuterskool) en Selina Nqejane (Masakhane Créche). Wat hierdie brandweer-inisiatief nog mooier maak, is dat die drie pryse met eie fondse deur die brandweerpersoneel aangekoop is as hul bydrae tot die kleuters se groot dag. Met verwysing na Mandela-dag, meld Jacques dat hulle graag vir Johnny Rockets vir die koeldrank bedank. Die drie wen-inkleurprente sal vir ‘n maand lank by die Brandweerstasie opgeplak en vertoon word.
Hardus Botha
