Daniel (Danny) Rivers is op Dinsdag, 26 Augustus 2014 in die ouderdom van 72 jaar en enkele maande oorlede.
Hy is op 22 Augustus met limfklier-kwaadaardigheid gediagnoseer en is slegs enkele dae later oorlede. Danny is op 7 November 1941 gebore en het in die Mariko-distrik in die destydse Wes-Transvaal grootgeword. Op 29 Maart 1975 tree hy met Stephanie in Alberton in die huwelik en die egpaar woon reeds vir die afgelope 19 jaar in Gansbaai. Hy het as een van Suid-Afrika se eerste “Rock”-sterre bekendgestaan, met landwye optredes vanaf 1947 tot 1975. Hy het saam met vele bekendes opgetree, soos Gene Rockwell, Dicky Loader, die “Bats”, Johnny Kongos, Archie Coker, Four Jacks and a Jill en Billy Forest. Danny verewig sy loopbaan op internet onder Suid-Afrika se “Rock & Roll” pioniers wat grotendeels deur die bekende Tertius Louw opgestel is.
Hy het van kindsbeen af ‘n passie vir musiek, kuns en kontaksport soos karate, stoei en boks gehad. Na die voltooiing van sy studies aan die Witwatersrand Tegniese Kollege (Analitiese Skeikunde), het Danny met landwye toere begin en as professionele musikant in vele gewilde nagklubs, hotelle en vermaaklikheidsplekke opgetree. Met Mervyn John (sy bewonderaarsklubpresident) en Clarke McKay (sy bestuurder), het Danny roem en gewildheid met etlike plate-opnames bereik. “Pretty Eyes” was een van sy groot “hits”, met ander soos “18 Yellow Roses” en “Can’t take my eyes off you”. In 1984 is Danny na Nashville in Amerika genooi, waar hy in die ateljee’s van FaronYoung en Chet Atkins opgetree het, asook as “Gospel”-sanger in die groot kerke in Ohio en Tennessee. In Desember 1959 het Danny saam met familie in Uilenkraalsmond kom kuier en was só met die omgewing beïndruk dat hy besluit het dit is die plek vir hom. Hier in Gansbaai het hy ‘n private vriendskapsklub, Klub Eden, vanaf 1997 tot 2001 met sy sangskool bedryf. Danny laat sy eggenote, Stephanie, sy 2 dogters, Angela en Tanay, 3 kleinkinders en 3 agterkleinkinders agter.
‘n Troosdiens is op Sondag, 31 Augustus 2014 in O.M.G.E.E. Bedieninge deur ds Deon Kloppers gehou, met ‘n tweede roudiens wat later in Alberton gehou sal word.
Hardus Botha
