Biblioteek gesluit

Gelukkig nie soos in permanent nie, daarvoor is die biblioteek té gewild en belangrik. Dit is op Donderdag, 11 September (vandag) gesluit vir ‘n besoek deur die Provinsie se Boekewa om nuwe boeke af te lewer en te registreer. Dan kan nou reeds kennis geneem word dat die biblioteek ook op Maandag, 22 September gesluit sal wees. Hulle rekenaarstelsel gaan opgradeer word om sake nóg beter te laat vlot as wat alreeds die geval is.

“Ons doen maar weer eens ‘n beroep op die gemeenskap dat die belangrikheid om van die biblioteek gebruik te maak, van uiterste belang is,” sê Sharman Geldenhuys, Bibliotekaris. “Hierdie beroep word op volwassenes én kinders gedoen.” In hierdie verband verwys Sharman na ‘n opmerking deur Albert Einstein: “The only thing that you absolutely have to know, is the location of your library!” Vier van die personeellede het ook aan die munisipaliteit se Loslitdag op 5 September deelgeneem, met hulle eie afskorting op die grasperk vir nie-bederfbare goedere vir Elim Tehuis en die Gansbaai Huis. Gansbaai Biblioteek se vriendelike en behulpsame personeel bestaan uit Sharman Geldenhuys (Bibliotekaris), Zelda Fourie, Edna van der Linde, Busisiwe Mtatase en ‘n gereelde aflos, Ronette Dreyer.

Hulle gerieflike bedryfsure is Maandae tot Vrydae vanaf 09:30 tot 17:30 en hulle kan by 028-384-8300 vir navrae gekontak word.                                                   

Hardus Botha

Vlnr is Ronette Dreyer, Sharman Geldenhuys, Bussiswe Mtatase en Edna van der Linde met hulle maskers ná hul deelname aan Loslitdag