HaS se dankbaarheid

“Na aanleiding van ‘n skrywe aan kinders, kleinkinders en agterkleinkinders deur Herberg-aan-See Tehuis vir Bejaardes, het Gansbaai Lionsklub besluit om ‘n bydrae tot hulle komende basaar te lewer,” vertel Ivy van Huyssteen van die Lions. “Omdat my moeder ook ‘n inwoner is, het ek besluit om self ook ‘n bydrae te lewer.” Ivy het ‘n tjek ten bedrae van R500 as Gansbaai Lions se bydrae aan die Bestuurder, John van Rooyen en suster Linda Meyer oorhandig. Die Lions se versoek is dat dié bedrag vir die lekkergoedtafel aangewend sal word. Terselfdertyd het Ivy twee pragtige skilderye, wat sy self geskilder het, oorhandig om tydens die basaar verkoop te word. “Dis altyd vir ons ‘n groot voorreg om hulp en ondersteuning in enige vorm te kan ontvang,” het John gesê. Die Tehuis se brief het na stygende kostes verwys en gemeld dat Gansbaai se Goue Hande se grootste jaarlikse fondsinsameling die jaarlikse basaar is. 

 ‘n Versoek is tot familielede van inwoners gerig om by een van die verskeie afdelings van die basaar in te skakel of om bydraes op een of ander wyse te lewer. Die komende basaar is vir Saterdag, 4 Oktober 2014 vanaf 10:00 geskeduleer en bied weer eens ‘n groot verskeidenheid van lekkernye, etes, handwerk, koeke en veel meer aan. Die gewildheid van hierdie basaar noop besoekers om betyds op te daag of dis neusie verby met die velerlei lekkernye.

Navrae vir hulp en/of bydraes kan aan Francia van Dyk by 028-384-0262 gerig word.

Hardus Botha

Vlnr is John van Rooyen, Ivy van Huyssteen en Linda Meyer tydens die oorhandiging van Ivy en die Lions se bydrae tot die basaar