Die burgerregte-organisasie AfriForum is bereid om die regskostes van skole met 'n Christelike etos te dra. Dié aanbod deur AfriForum volg nadat die voorsitter van die Organisasie vir Godsdiensonderrig en Demokrasie, Hans Pietersen, 'n hofaansoek ingedien het om ses skole, onder meer, te verbied om hulleself Christen-skole te noem.
Volgens Carien Bloem, hoof van AfriForum se onderwysveldtogte, vind die organisasie dit onaanvaarbaar dat teengodsdiensfundamentaliste nou skole viktimiseer in 'n poging om kinders te dwing om nie hulle godsdiens te beoefen nie.
Bloem meen verder dat dit ironies is dat die teengodsdiensfundamentaliste daarop aanspraak maak dat hulle nie kinders onder dwang aan skoolgodsdiens wil blootstel nie, maar nou self hulle teengodsdienstige siening op alle skole wil afdwing.
“Die teengodsdiensfundamentaliste se benadering is skerp in teenstelling met die godsdiensbeleid wat reeds in skole gevolg word, wat behels dat geen leerder gedwing word om aan skolegodsdiens deel te neem nie,” het Bloem bygevoeg.
Carien Bloem