6 Oktober begin die vierde programreeks van Liedjieboer Rumoer op RSG, Maandagaande tussen 21h00 en 22h00 met jou gasheer Anton Goosen. Die Akoestiese Reeks gaan oudergewoonte met agtergrond-inligting oor die kunstenaar/s en “songs” aangevul word en die musiekkeuses gaan konsentreer op gevestigde kunstenaars soos o.a. Ben Harper, James Taylor, Willie Nelson, Kristofferson, Dylan, Cohen, Springsteen ens. sowel as nuwe en minder bekende kunstenaars soos Paolo Nutine, Jen Foster, Seasick Steve, Mandolin Orange, Birdy, Eric Bibb, Townes van Zandt, The Lumineers, Alison Kraus and Union Station, ens. Oudergewoonte val die klem eerder op kwaliteit in die verskillende genres, eerder as kommersiële waarde.
Die musiekskrywer Craig Conley het gesê: "When music is labeled acoustic, unplugged, or unwired, the assumption seems to be that other types of music are cluttered by technology and overproduction and therefore aren't as pure.” Dit is nogal ’n puristiese definisie en die Akoestiese Reeks gaan losweg daarop geskoei wees, maar in kort sluit dit Hammond orrel in, maar nie elektriese ghitare, elektroniese klawerborde, sintetiseerders, kompermusiek ens nie. Iemand het gesê: "solank daar instrumente uit hout gemaak word, sal daar werklike musiek gemaak word en soos die grunge en rock bands in die 90’s met die unplugged opnames bewys het, is akoestiese musiek die 'uithaal-en-wys' van enige genre."
Die reeks word saamgestel, opgeneem en verpak in Gansbaai.
