Dit is weer tyd om totsiens te se

Dit is ‘n surrealistiese gevoel – die einde van 2014 het aangebreek. Die einde van die akademiese jaar vir die matrieks is om die draai. Die eindeksamen staar hulle in die gesig met die eerste vak wat alreeds op die 20ste Oktober geskryf word.

Soos die tradisie alreeds daar gestel is, sal die groep ook deur die dorp loop op Vrydag 17 Oktober. Vanjaar se matriekgroep is ‘n spesiale klompie, want hulle is die eerste groep wat die volle siklus vanaf graad agt voltooi het. Soos die gebruik sal die groep ontbyt eet en daarna deur die dorp na die skool stap.

Die seremonie in die skoolsaal is om aan die leerders hul eksamennommers te oorhandig en vir oulaas gemotiveer te word vir die strawwe tyd wat voorlê. Ouers van die matrikulante is baie welkom om die seremonie in die saal by te woon.

Academia wil ook van die geleentheid gebruik maak om aan die gemeenskap van Gansbaai dankie te sê vir al die ondersteuning. Vanaf die “Cinderella” projek om leerders se droom vir ‘n fabelagtige matriekafskeid moontlik te maak tot elke donasie en omgee vir ons kosbare kinders.

Die skool se jaarlikse Prestige-aand vind plaas op die 23ste Oktober. Dan is dit skouer aan die wiel vir die laaste ses weke van die kwartaal.

Liezel Mostert

2013 se “Dorploop”