Die springbok, Ashwin Willemse se Greensmile Foundation het vanaf 5-9 Oktober 2014 'n 0/15 Greensmile Uitnodigings Span na die SA Rugby Legends se jaarlikse Iqhawe Nasionale Ontwikkelings Rugby Toernooi in die Kaap gestuur.
Die spelers is gekies vanuit die 8 Greensmile skole in die Overberg, nl Swartberg, Emil Weder, Groenberg, Hawston, Villiersdorp, Albert Myburgh, Gansbaai Akademia en De Rust Futura. Hierdie span het egter almal verbaas en het die toernooi onoorwonne afgesluit nadat hul die ontwikkelingspanne van die Leeus, Bulle en die OP geklop het. Wat hierdie prestasie nog meer indrukwekkend maak is die feit dat hierdie spelers uitgeval het by die Boland proewe, en as n streek span teen volwaardige uniespanne gekompeteer het, nadat Natal onverwags onttrek het.
Die span het ook algehele 3de plek behaal uit n totaal van 14 spanne. Die span is afgerig deur die Gansbaaier, Danver August, wat verbonde is aan die Overstrand Munisipaliteit se afrigtingsprogram by Gansbaai se gemeenskaplike sportgronde. Drie leerders van Gansbaai Academia is in die span opgeneem, Jonathan Martin (8), Donnadue de Villiers (10) en Wimpie van Dyk (1).
Die bestuur van die Greensmile Uitnodiging Span wil graag die ouers bedank vir hul bydrae, asook die borge, nl: Afc, Mnr& Me Paul de Villiers,Robert Hendricks, Louis Jordaan, Ray Moore, Genadendal Rugby Klub, wat n bydrae gelewer het tot die sukses van die jong span. Baie dankie ook aan die skole wat hul onbaatsugtige ondersteuning gee aan die Greensmile Foundation.
Francois de Jongh
