Die Gansbaailede van Scatteredlinks, Overberg Chapter se jaarlikse liefdadigheidsprojek skop vanjaar sommer vroeg-vroeg af. Helder oranjekleurige kartondose sal in etlike besighede in die dorp opgemerk word. Welkome donasies soos nie-bederfbare voedsel, toiletware, speelgoed, kleertjies of wat-ookal kan tydens inkopies daarin geplaas word. “Kontantdonasies vir die aankoop van sodadige items sal ook verwelkom word,” sê Juanita Maree, een van die organiseerders. Die bekende motorfietsklub se voorsitter is Pieter Maree en hulle beplan om die inhoud van die kartondose gedurende die week voor Kersfees in Gansbaai onder alle gemeenskappe met hulle motorfietse uit te deel.
Jaarliks het hierdie optrede van hulle vir buitengewone opwinding onder die kinders gesorg en daar kon ook groot-oog na die blink ysterperde gekyk word en selfs voel hoe dit voel om opgelaai te word. “Ons vertrou dat ons net soos in die verlede wonderlik deur die publiek ondersteun sal word, aangesien die behoefte vir hierdie donasies onder alle gemeenskappe in ons dorp baie groot is,” sê Juanita. Die klub se e-pos adres vir navrae is scatteredlinks.overberg@gmail.com. Navrae rakende donasies, die oranjekleurige kartondose en die prosedures rakende die projek, kan aan Wilna by 072-109-8728 gerig word, of skakel Juanita Maree by 083-665-5341.
Hardus Botha