‘n Brief met ‘n verkeerde Gansbaai posadres daarop en wat aan “Auntie Dee” geadresseer is, se eienaar is deur Gansbaai Courant se Smalls opgespoor. Lorraine Ramsauer van Dyer Eiland Visserye het die brief vanaf Engeland verlede week in haar posbus gekry. “Ek wou dit nie as ‘onbekend’ terugstuur nie,” het sy gesê. “Ek was bang dat die brief dan nooit by die regte ontvanger sou uitkom nie.”
‘n “Gevind” is in verlede week se Smalls van Gansbaai Courant (Donderdag, 16 Oktober 2014) geplaas en op Saterdag, 19 Oktober 2014 het “Auntie Dee” die Courant se kantore geskakel. Gelukkig was hier iemand om haar oproep te kon ontvang. Op Maandag, 20 Oktober 2014 het sy by die kantoor opgedaag. “Auntie Dee” is toe inderwaarheid Dee Varchmin van De Kelders en haar posbusnommer se eerste twee syfers is per abuis omgedraai op die brief. “Ek is baie dankbaar teenoor Lorraine Ramsauer wat die brief hier kom indien het, aangesien ek dit nou in my besit het,” het Dee gesê. Nouja, Gansbaai Courant se Smalls werk toe selfs vir ‘n verlore brief.
Hardus Botha
